Txapela: 6-12 cm-ko zabalera izan dezake. Hasieran hemisferikoa, gero konbexua eta azkenean zapala. Gaztetan horixka-oliba, gero gris-horixka eta gris-arrea; zahartutakoan arre-beltza. Kutikulak apenas du zimurrik eta ez da belusatua, baina arrakalatzeko joera du.

Laminak: Hodi luzeak, itsaskorrak, zuri-horixkak hasieran baina gerora zikin kolorea hartzen dute, grisa-edo. Poro txikiak ditu, hodiaren kolore berekoak. Egundo ez dira erabat zuriak.

Oina: Luzea eta lerdena (8-13 cm). Haritsua eta sendoagoa oinaren behealdean. Goitik behera marrazten diren pikorrez josita dago. Pikorrak hasieran zurixkak edo horixkak dira, baina gero belztu egiten dira. Nabarmendu egiten dira oinaren fondo zuriaren gainean.

Mamia: Txapelaren mamia biguna da, baina oinarena haritsua. Mozterakoan zuria da, baina hortik gutxira kolorea aldatzen du: arrosa-gorria, arrosa zikina gero eta arrosa bioleta azkenean. Usain eta zapore atseginak.

Noiz eta non aurkitu: Udan eta udazkenean baso hostogalkorretan, batez ere, pago eta harizpetan.

Jangarritasuna: ONA. Ez da oso estimatua mamia belztu egiten delako sukaldatzean.

Oharra: Leccinum scabrumekin nahas daiteke, baina honen kutikula argiagoa eta belusatua da. Gainera, mozterakoan, kolore arrosa edo urdin zurbila hartzen du, sekula ez beltza.